B女靓样曝光！张继聪慈父样出晒嚟 方力申掟煲一年暗寸邓丽欣难服侍

  B女靓样曝光！张继聪慈父样出晒嚟

  现年40岁的谢安琪（Kay）再度荣升妈咪，昨日入院剖腹诞B女囡囡张靖，恨女恨到发烧嘅张继聪开心到不得了，啱啱喺社交网晒B女Karina靓样，佢留言：「感谢大家嘅祝福，Karina says hi to everyone。」见阿聪抱住B女，成个慈父样出晒嚟呀！

  收到大家满满的爱及恭贺，谢安琪留言谓：“感谢家人和医护人员对我的细心呵护，仿佛连我也变成一个小宝宝，真的很温暖很窝心，所以大家请放心，我一定会复原得很好的。”她亦代囡囡张靖多谢大家的关心及祝福，指女儿很乖，以心型猪嘴向大家说声Hi咁话喎！

  展鹏传挞单文柔胡蓓蔚唔安慰胡定欣

  艺人胡蓓蔚出席品牌活动，提到陈展鹏与单文柔传出绯闻，问到有否安慰好姊妹胡定欣？她表示刚从上海回港：“唔需要。（有冇通电话？）我哋每日都WhatsApp 。（点解呢个唔使慰问？）佢哋都话系萤幕情侣，冇话过一齐。（玩地下情？ ）咁我要问吓先，定欣冇讲过，咁friend冇同我讲即系冇呢件事。（唔稳定所以唔讲？ ）冇开始点稳定。”问到会否介绍男仔给定欣？她直言每晚睡不着都会扫电话薄，但仍未找到。她更笑言与老公要再发掘有潜质的男仔。问到是否要筛选？她表示最重要是沟通及了解。

  提到老公单立文曾说过“展定恋”是姣婆遇着脂粉客，她解释：“我老公讲嘢都好信？乱噏。（被讲到男方一脚踏两船，定欣会唔会唔开心？）展鹏同埋定欣都冇话过开始，展鹏同我哋好朋友唔会同我哋讲大话。（但佢同记者讲大话？揽腰？）点解你哋唔选择去信人，我老公都揽我啲朋友。（知唔知展鹏拍拖？）唔知。（如果你老公车你唔识嘅女仔上山顶？）太迂回，佢揸车返将军澳。（老公未有时间偷情？）so far未。（教展鹏唔好上山顶？）人哋去山顶睇风景。（佢哋上山顶食外卖？）外卖好餐厅多人等位，大家以祝福嘅态度开心好多，男未婚女未嫁。”

  阿娇介入人哋感情？阿Sa撑：行得正企正

  艺人蔡卓妍（阿Sa）晚上出席公开活动，穿上皮褛亮相嘅佢轻轻露肩，甚有韵味。阿Sa笑言露少少就可以，要适可而止，笑言：“自我感觉良好就得啦。”问到佢依家感情状况，系咪有人追求紧？佢就话：“不嬲都有架啦，咪睇少我。（未拣啱？）唔答呢啲，之前古天乐教我唔好回应咁多感情事。”

  问到好姊妹锺欣潼（阿娇）同内地富二代秦奋传出绯闻，蔡卓妍就话：“朋友嚟嘅，佢之前都有嚟睇我演唱会，佢哋唔系拍拖。（阿娇被指介入人哋感情？）唔需要回应，多枝折生。行得正企正。”问到阿娇有冇向佢诉苦？阿Sa就话：“吓？大家做咗十几年呢啲湿湿碎，人哋讲咩由佢，人生唔系睇呢啲人脸色，要享受人生。”对于有指秦奋嘅女友亦有喺社交网亦有表态，阿Sa就耍手表示唔知道。再追问阿娇依家有冇拍拖？阿Sa就话：“唔回应，结婚嗰时你哋咪知啰。（咁迟先知）啋，咁样咒我哋！”

  郑少秋汪明荃赵雅芝重现《倚天》经典

  艺人郑少秋录像无线特备节目《群星唱谈郑少秋》，获70年代「三大花旦」汪明荃、赵雅芝、黄淑仪撑场，郑少秋更搞笑大叫：「好多靓女呀！」郑少秋、汪明荃及赵雅芝更齐齐影合照，重现《倚天屠龙记》的经典组合，郑少秋笑谓：「大家快啲影，呢张合照唔知几时再有机会影，期待下个50年，正呀！」

  郑少秋表示今次嘉宾是主动来撑场，故令他欠下一身人情债，又笑指：「冇靓女我唔嚟㗎，唔制㗎，哈哈！」至于可会担心嘉宾爆他料？他笑谓节目叫《唱弹郑少秋》，当中一定有「弹」的部分！至于演唱会，他表示定会载歌载舞，更即席表演一小段经典洗脑歌《香港料理》，又答应在个唱中再唱，被问会否「扮嘢秋」上身？他谓造型百变。

  谈到囡囡郑欣宜未能做嘉宾，他说:「可惜啦，无办法佢有工作在身！」至于「蟹仔」陶大宇自荐被他掟落台，他即搞笑说：「咁就要搭高个台嚟掟！」节目录像时，汪明荃谦称黄淑仪才是郑少秋在无线里的第一个夫人，她笑谓：「因为我后生啲，仲未出现。」黄淑仪就谓从未见过一个男人似郑少秋那么贪靓，郑少秋即驳嘴：「最惨系我扮得靓！Gigi嗰阵已经系阿姐级，可以同佢合作，我一定应承！」及后郑少秋与赵雅芝献唱时，他更大赞女方双眼迷人，当年少点定力也会忘记对白。

  方力申掟煲一年暗寸邓丽欣难服侍

  分手要狠，Nuts哥真系要问吓方力申同邓丽欣（Stephy），拍拖十年话分就分，咁放得低，唔系好多人做到㗎。两个人好日唔见面，之前咁啱孖住见人，撞正分手一周年纪念，一样交唔到戏，完全真情流露零交流，成365日都冲淡唔到，分手原因可想而知有几僵。

  近日轮到方力申单拖出席慈善活动，唔知系咪冇Stephy企喺隔篱眼超超，讲嘢都零舍到位，佢话早排去山区探访完，当地水都冇，水就好似钻石咁，搞到佢返香港后浸浴变花洒冲凉五分钟搞掂，仲话做人最紧要识知足。唔知系咪分手期已过，佢讲嘢冇话就住就住，形容自己改变唔少，以前对工作有野心，家下就只求做好本分，就连择偶条件亦唔同，话明要求高咗，以下系佢真情自白（绝对足本，未经剪辑）：「靓女一定要，朴素啲，因为我都系朴素嘅人，啱啱食完鸡蛋仔，自己好锺意食街边地道小食，女朋友要容易开心、容易满足同容易凼。」Stephy靓女就梗啦，但就系冇乜见过佢食街边嘢，朴素应该唔会，因为成日撞见佢买衫。至于Stephy系咪好难开心、唔易满足同难凼，未相处过唔敢讲，唔通方力申趁一周年「纪念日」有感而爆，暗示邓丽欣难服侍？

  其实佢同Stephy本来系爱情神话，当飞鱼王子遇上青春女神，怎料，经过一个暴风嘅晚上，完全被打落凡间试炼，「金童玉女」变为「痴男怨女」，两个人一分手就好似揽炒，好似齐齐「撞邪」咁，Stephy突然「转性」多咗个同性密友，十足男人勿近！反而方力申变身情场浪子，系女都啱，莫讲话赌王千金，连女粉丝都唔放过，认真十年功力一朝丧，之前储落嘅阳光正能量全部沽清。犹记得旧年佢哋一宣布分手，引发全城网民疯狂式洗版讨论，震撼程度好似原子弹喺MK引爆咁犀利，个个当正好似自己甚至阿爸阿妈离婚咁伤怀，依家搞到咁，好多粉丝应该好戥佢哋可惜。有人话佢哋当日身边冇个和事老，先发展到目前呢个死局，咁如果有take two，解铃还须系铃人，除了叶念琛不作他人想。

  最新消息：《B女靓样曝光！张继聪慈父样出晒嚟 方力申掟煲一年暗寸邓丽欣难服侍》相关视频内容，可关注微信公众号（starxinbei）阅读。